Sveti Lovro
Jema sam borbu u For
Zvo se Lovro
Oko pol osmega miseca
na don Svetega Lovre
glumi bi u crikvu u predstavi
Život Svetega Lovre
i uvik slabo paso za glovu kraći
ma bi već ujutro na rivi bi živ
i sa puno žijenskega svita oko sebe
Kasnije san ja nabavi pentu
a on je jema stori darveni kaić
pok smo svako godišće liti
strugoli trovu i storu kaluru s kaića
i dovali ruku nove kalure
po šufitima iskoli
vesla, sidra, škerme i konope
sve za vozit se oko mista di se kupodu divnje
Lovro bi uvik kad bi vidi kakovu lipu mlodu
da je legla na stinu ka gušćerica reka:
Vi, guja, čin se rodi grize!
Ali bi njemu guje sve isto dohodile
do prid posteju kad bi na gramofon pusti Wagnera ili Verdija
I meni su divnje dohodile ali kad bi pusti Rolling Stonese
Lovrota već ni
NIje bi Sveti ma jo ga se sve isto spominjen
jer mi je bi borba!
Svetemu Lovri
siguro nisu dohodile divnje
jer ni imo ploče a možda ni kaića
Zato je posto Sveti
Njega se ne spominjen!
Neven Dužević
