DOK SAN TE JUBI
dok san te jubi
kroz glovu su mi pasovale
sve moguće štorije
koliko ćeš mi dice dat
di će nan bit kuća
hoće li te moja mater zavolit
hoću li morat puno lavurat
hoću li lavurat u u ured i poslije u poju
ili ću bit tvoj ribar na trabakulu
noću i pod svićon
i hoću li te digod privarit
sa susidon iz dvora
ako se natustiš pod nike done…
Sve san to penso
do jedne večeri
kad si mi rekla
da se griješ udat za Stipeta
koji jema bokun auta
lavuro
imo poje
zna ča hoće
i ne gre pensat ispod smokve
zoč je misec na nike dneve pun
i pisat poeziju…
Nison dobro spo
Jubov je išla u ariju
Nikad mi nećeš dat dicu
nikad neću bit tvoj ribar
nikad se meni nećeš natustit nego drugemu
i uvik ćeš mislit o meni
da sam bokun šempjast ali dobar čovik
jer te nikad nisan privari…
Neven Dužević
