Aldomaš za staro leto

 

Na kraju se nofci broje, tak vele

a meni mam navrnu versi

kak izvorske vode, zdene i žeđne

da me sete kaj mi je ovo leto sega dalo

kaj se je novoga v meni tkalo, 

zanjihalo kak faldana podsuknenka

dekle mlade na konake

z rumenema obraze

ko na veselici na kojoj bi štela reći fala

Životu, svetu i starom letu, semu kaj mi je dala.

 

Nakon trideset let doma sem nazaj došla

v Berek, gde raste voščenka na mojim peskima, gde srne pasu v jutra rana, dok se megla vleče pod oblokom pol dana, gde još dišu joča i mati, gde se zbudim zaran, vesela kaj se morem z njima i svaditi i smejati

i kaj nesem sama. 

 

V život su mi ovo leto došli Picoki koje prije nesem znala, navčili su me kaj je prava pajdašija i na tome im puno fala. Z njima po vrje plažem, landram po svetu, a ak kaj treba nekom pomoći neje teško dojti ni v pol noći.

 

I srčeko se je malo rasitalo, pa se v roke

Picoku jednom dalo, pa sad samo zdihavljem

i žalosne pesme pišem al valjda je moralo tak se to biti, ak nikaj drugo stalno me je špotal

(to mu jedino dam za prav) 

Kak se moram đurđevečki navčiti.

 

Vrtgla sam se tri put ovo leto,

pukle drobne kosti v telu, valda da se setim

da se ono kaj me pritiska znutra vidlo se bu zvana, i da negda moram stati, zraka zeti, 

a ne saku priču terati do ranja.

 

A nofci kak nofci, dojdu i otidu

Dokle god nisi gladen, 

a deca su vesela i zdrava,

a uz sve to moreš po brege plazati

i po svetu landrati

Ništ nemre tak žmeko biti 

kaj čovek nebi mogel prek pleća prehititi. 

 

Drava mi je kak i navek posebne dare dala jer

dok dojdem k njoj osečam kak da me svojim tokom draga po lasima, da mi je kak god žmeko, za me ta voda v sebi leka ima. 

 

I tak na kraju sedim z mojim pajdaše i gruntamo

jel bi se mogla i jel se sme i more reč “aldomaš” v ovoj pesmi kak nekakov zaključek deti, kak pesnikova misao najti, jer si znamo kaj ta reč znači.

 

Ipak smo celo leto trgovali, posle sklapali, pregovarali, mudruvali z životom, negdar pristali na menje, negdar dali puno više.

Pogodili se, ne kak smo šteli nego kak je samo od sebe zišlo…

 

Tu smo se sad svi smejati počeli, jer si smo još navek živi, veseli, črleni i debeli pa smo se na na kraju složili da je pravo vreme za zafaliti i staro leto z aldomašom otpratiti.

 

Danijela (Daša)